ГлавнаяЭкономикаНатижйир харжидар дар

Натижйир харжидар дар

1 1 1 1 1 1 1 1 1 1 Рейтинг 5.00 (1 Голос)

Имираслан Ярялиев1

Налог – му гьюкуматдин финансарин харжар ккацIбан бадали тешкилатарилан, гьюкмин органарилан ва физический касарилан уч апIурайи мажбури вуйи гьякь-гьисаб ву. Налогар гьюкуматдин, гьадму гьисабнаан муниципалитетарин гъазанжарин асас булагъ ву. Гьаддиз дурар илирчбан бина яркьу апIбаз ва уч апIбаз аьхиримжи йисари ихь республикайиъ, гьадму гьисабнаан Табасаран райондиъра, аьхю фикир тувра.

Ккудубшу йисан «Табасаран район» МР-иъ налогар уч апIбан натижйир, райондин администрацияйин главайин сарпи заместитель Имираслан Ярялиевди (шиклиъ) гъапиганси, ужудар ву. Имираслан Ярялиев райадминистрацияйиъ, жара месэлйирихъди сабси, налогар уч апIбан месэлйиризра лигура. Ккудубшу йисан Табасаран райондиъ вари жюрейин налогар, уьмуми гьисабниинди, 105,9%, яна улупнайи табшуругъниинди 120 628 агъзур манатдин налогар уч дапIну ккундийи, хъа гьякьикьатдиъ 127 758 агъзур манатдин налогар уч гъапIну. Налогарин арайиъ асас йишв физический касарилан уч апIурайидари, ГСМ-дин акцизари, физический касарин мутмуйилан вуйи, жилин налогари ва госпошлинайи бисура. Гьаци, 2018-пи йисан райондиъ физический касарилан уч апIру налогар табшуругъниинди 71 104 агъзур манат улупну айиш, гьякьикьатдиъ 76 223 агъзур манат уч гъапIну – му 107% гьисаб шула. ГСМ-дин акцизар табшуругъниинди 17 785,3 агъзур манат вуйиш, гьякьикьатдиъ 19 217 агъзур манат уч гъапIну – 108%. Сабвуйи гъулан мяишатдин налог табшуругъниинди 341 агъзур манат вуди, 563 агъзур манат уч гъапIну – 165%. Физический касарин мутмуйилан вуйи налог уч апIбан табшуругъ 1 327 агъзур манат вуди, 1 314 агъзур манат уч гъапIну – 99%. Жилин налогдин табшуругъ 6 400 агъзур манат вуди, 6 978 агъзур манат уч гъапIну – 109%. Госпошлина уч апIбан табшуругъ 1 200 агъзур манат вуди, 842 агъзур манат уч гъапIну – 70,2%.

Налогарин гъазанжарин улупуб, уьмуми гьисабниинди, 115 636 агъзур манат гьисаб шула. Миди 106,8% тяйин апIура. Хъа табшуругъниинди улупнайиб 108 256,7 агъзур манат вуйи.

Райондин бюджетдиз налогарин дару гъазанжарра гъафну, гьадму гьисабнаан, месела, табиаьтдин дакьатар ишлетмиш апIбахъ туву гьякъи, пулихъ вуйи гъуллугъар тамам апIбахъан гъафи гъазанжар, арендайиз жил тувбан ва гьаци жарадар. Ккудубшу йисан райондин бюджетдиз налогарин дару 12 371,3 агъзур манат гъазанжар уч апIуз план улупнайи. Хъа гьякьикьатдиъ 12198 агъзур манат уч гъапIну. Му пландиинди улупнайибдин 98,6% ву.

КьатI’иди кIуруш, месела, пулихъ вуйи гъуллугъар тамам апIбахъан гъафи гъазанжар, табшуругъ 7 786,3 агъзур манат вуди, гьякьикьатдиъ 7 668 агъзур манат уч гъапIну. Жил арендайиз тувбалан, табшуругъ 2 105 агъзур манат вуйиш, гьякьикьатдиъ 2 309 агъзур манат уч гъапIну. Журумар апIбалан, табшуругъ 2 млн манат вуйиш, гьякьикьатдиъ 1 974 агъзур манат гъазанжар гъафну. Налогарин дару миди вуйи жюрейин гъазанжар 480 агъзур манат ву.

– Налогар уч апIбаъ райондин гъуларин поселенйирира ужуб ляхин гъубхну, – гъапнийи ич гюрюшдиъ Имираслан Ярялевди. – Месела, чпиз улупнайи табшуругъар Арак гъулан поселениейин администрацияйи 112%, Ккуми гъулан – 114%, Гурихъ гъулан – 119%, Жулжагъ гъулан – 132%, Къужник гъулан – 135,1%, Халагъ гъулан – 116%, Хюрикк гъулан – 121%, Хючна гъулан – 127% уч гъапIну. Гьяйифки, саб жерге гъуларин поселенйирин администрац-йири чпиз улупнайи табшуругъар тамам гъапIундар. Месела, думу терефнаан вуйи улупбар ЧвулатI гъулан поселениейин администрацияйин 50,6%, СиртIич гъулан – 56,6%, Бургьанкент гъулан – 89,9% ву.

Уьмуми гьисабниинди, райондин гъуларин поселенйириъ улупнайи табшуругъдиз асас вуди, 11 695 агъзур манат налогар уч дапIну ккундийиш, гьякьикьатдиъ 12 490,5 агъзур манат уч гъапIну. Му улупнайибдин 106,8% гьисаб шула.

«Табасаран район налогар уч апIбаан республикайин улихь хьайи районарин жергейиъ ади швнуд-сад йис ву. Ккудубшу йисандин натижйирра харжидар дар. Налогар уч апIбан улупбарикан агьалйирин яшайишдин дережара асиллу шулайиб гьархну ккундар»,

– гъапнийи Имираслан Ярялиевди.

Комментарии:

f1 in1 ok1 t1 v1 y1

Top