ГлавнаяИнтервьюКьувват хизанди тувразуз

Кьувват хизанди тувразуз

1 1 1 1 1 1 1 1 1 1 Рейтинг 5.00 (1 Голос)

maxresdefault

Дербентдиъ Айваз Аьлиханов таниш дару кас гьеле-меле хьуб мумкин дар. Думу Дербент шагьрин депутатарин Собраниейин депутат, жямяаьтлугъ кас, швнуб-саб ерли телевиденйирин генеральный директор, РД-йин табасаранарин милли советдин председатель ву. Учу Айваз Аьлихановдихъди сюгьбат гъабхуз ухдихъан мина планламиш дапIнайча. Ва магьа, Дербент райондиз вуйи нубатнан командировкайиъ дугъахъди гюрюшмиш гъахьнийча.

Айваз Аьлиханов Хив райондин Яргъил гъулаъ бабкан гъахьну. Дербент шагьриз кючюрмиш духьну, 55 йистIан артухъ шулашра, дугъаз чан багъри ругар кIваълан гьархрадар. Фунуб вахтна вушра, думу багъри гъулахъди, гъулан жямяаьтдихъди аьлакьалу серенжемариъ жанлу иштиракчи ва тешкилатчи ву. Мидланра гъайри, Айваз Мягьсумович, табасаран халкьдин улихь дийигънайи учIру месэлйир арайиз адагъури, дурар гьял апIру рякъяр агузра чалишмиш шула.

Гъябгъюрайи йисан сентябрихъан мина Айваз Аьлиханов Дербент шагьрин депутатарин Собраниейин КПРФ-дин фракцияйин руководитель ва гьацира гьадушваъ СМИ-йин, жямяаьтлугъдин ва ерли самоуправлениейин месэлйириз лигру комиссияйин председатель ву.

«Учву узхьан, депутатвалин ляхин гъагъиб вуйин кIури, гьерхрачва. Му суалназ саб-кьюб гафниинди жаваб тувуз гъагъиди шулу. Сабпи нубатнаъ, варитIан асасуб – депутатвал му кьатI’и ва жавабдар гъуллугънан ляхин ву. Фицики депутатдин ляхнин натижайикан кIулди шагьринси, шагьрин агьалйирин уьмрин гележегра асиллу шула. Мушваъ фуж кьастлуди, яна кIваантIан, хъа фуж вижнасузди чан ляхнихьна янашмиш шлудар алахъуб мумкин ву. ИкибаштIан, саб вая жара месэла, гьяракат фици гьял шулушра бейхабарди гъузри, фунуб вушра къарар кьабул апIуз, жвуван сес тувуз шулу. Хъа дици дубхьну ккундар. Сифте гьарсаб ляхнин, къарарин, гьяракатнан анализ дапIну, экспертарин фикрарихъ, гъарашугъарин теклифарихъ хъебехъну ккунду. Депутатвал – му саб кьадар жандин кьувватар ккун апIурайи, саб фу-вуш цIийиб арайиз хурайи ляхин ву. Дугъахьна чпин учIру месэлйир хьади инсанар илтIикIура. Гьарсар касдин дерди-балайихъ хъпехъувал, чахьан удукьру кюмек апIувал депутатдин буржйирикан гьисаб шула»,

– къайд гъапIну Айваз Аьлихановди.

Дугъан гафариинди, Дербент шагьриъ 17-18 агъзур табасаранар яшамиш шула. Гъи асас вуди дурарин улихь дийигънайи учIру месэлйир шагьрин идара апIру вая жара заан гъуллугъариъ кадрйир адрувалихъди, экономикайин, культурайин, социалин цирклин зяифвалихъди аьлакьалу ву. Дугъахьна ватандашар деъру хал-йишв, ляхин адрувалихъди, яшайишдин гъагъи аьгьвалат арайиз дуфнайивалихъди аьлакьалу ва гьацдар жара учIру меэслйир хьади илтIикIури шулу.

Депутатдик гъалабулугъ’вал кипрайи учIру далилар хъана а. Мисалназ, 18 агъзурихьна табасаранар яшамиш шулайи аьхю шагьриъ саб кючейиинкьан табасаран халкьдин вакиларин ччвур иливнадар, я сабкьана паркдиъ, я шагьрин кючейихъ хъайи бицIи багъдиъ ихь миллетдин вакилиз бахш дапIнайи ядигар дивнадар. Му месэлайин гьякьнаан Айваз Аьлиханов швнуб-сабан шагьрин администрацияйиз илтIикIнийи, хъа гьелелиг месэла гьял апIуз шуладар. Ич сюгьбатнаъ Айваз Мягьсумовичди къайд гъапIганси, цIиб улихьнаси шагьрин администрацияйи саб кючейиз Ибрагьим Шагьмардановдин ччвур тувбан гьякьнаан вуйи аьрзйирин кагъзар кьабул гъапIну. Хъа месэла фила гьял шулуш, саризра мялум дар.

Къайд апIуб лазим вуки, Айваз Аьлихановди Дербент шагьриъ ихь ватанагьлийириз, ихь шаирарин юбилеяриз, машгьур спортсменариз бахш вуди швнуб-саб аьхю серенжем тешкил гъапIну. Гьаму йис ктабхъайиз, думу Дагъустандин халкьдин писатель Шагьвелед Шагьмардановдин юбилей тешкил апIуз гьязур шула. Хъа гьаму месэлйир ихь халкь заан апIурайи, культура, спорт улихь гъахуз кьувват туврайи месэлйир даринхъа?!

Ич сюгьбатнан аьхириъ Айваз Аьлихановдихьан, политикайин, жямяаьтлугъдин, телекомпанйирин месэлйириз дилигну, хулан ляхнарра тамам апIуз вахт фици гьубкIраш, гьерхнийча. Хъа мициб жаваб гьякьлу табасаран жвувутIан тувудар: «Фунуб вушра ляхниз кьувват лазим ву. Узуз кьувват йиз хизанди, уьмрин юлдаш Надяйи ва йиз веледари тувразуз. Дурар йиз мумкинваларихъ, удукьуваларихъ хъугърайивалиан лихуз кьувватра, аьшкьра шулазуз».

Дупну ккундуки, Айваз Мягьсумович спортдиинра машгъул ву, ва учкан дугъу чан терефнаан жигьилариз ичкийихьан, папрусихьан ярхла хьувалин, жвуван ватан, хизан, гъул, дустар ккун ва аьхюдариз гьюрмат апIувалин, бицIидарин гъайгъушнаъ хьувалин теклифар пуб ккун гъапIнийи.

Яв тIалаб тамам гъапIунча, Айваз Мягьсумович. Гъит, думу сес варидариз ебхьри!

Комментарии:

Комментарии  

0 #1 Дзен 30.11.2018 16:15
аЙВАЗ ХАЛУ ГЬАМУ ИХЬ ИСТОРИЯЙИН КИТАБ УДУБЧ1ВУН А. История табасарана. Табасаран с древнейших времен до наших дней.они на руках у людей в единственных экземплярах.что б массово напечатать нельзя принимать какие нибудь меры
спасибо.
Цитировать

f1 in1 ok1 t1 v1 y1

Top