ГлавнаяИнтервьюХатIалу гьядисйир дархьбан бадали

ХатIалу гьядисйир дархьбан бадали

1 1 1 1 1 1 1 1 1 1 Рейтинг 5.00 (1 Голос)

777

Ихь уьмриъ йислан-йисаз учIврайи гъулайвалари инсанарин яшайиш рягьят апIура. Шагьрариъ айи вари гъулайвалар гъийин вахтна гъулариъра а. Гъулайварихъди сабси ихь уьмриъ хатIалуваларра артухъ шулайиб гьархну ккундар. Кьюрдун фаслиъ хатIалу гьядисйир дархьбан бадали гъапIну ккундуш аьгъю апIури, узу Дербент шагьриъ айи Урусатдин МЧС-дин РД-йин ОНД ва ПР №5 тешкилатдин начальник, подполковник Р.А.Рамазановдихъди гюрюшмиш гъахьунза. Ич арайиъ гъабхьи сюгьбат исихъ чап апIурача.

– Рустам Аьбдулаевич, ичв тешкилатдин пишекрари ялгъуз Дербент шагьриъ чпин вазифйир тамам апIуйин? Образованиейин тешкилатариъ ЦIийи йисаз вуйи серенжемар кIули гъягъру вахтнара, гьацира хусуси хулариъра токрак кивру гирляндйир ишлетмиш апIруган, хатIасузвализ артухъси фикир туври ачва?

– Учу Дербент, Дагъустандин Огни шагьрариъ, Дербент ва Табасаран районариъ ич вазифйир кIули гъахурача. Дугъриданра, ЦIийи йисахъди аьлакьа айи серенжемарин улихь учу, образованиейин вари тешкилатариъси, вари йишвариъ пиротехникайи, токрак кивру алатари хатIа дархбан бадали, гъаврикк ккаъбан ляхин кIули гъахурача. Гьацира муниципалитетарин, образованиейин пишекрарихъди сабхилди хатIасузвалин серенжемариз вуйи план гьязур дапIнача. ЦIийи йисахъди аьлакьа айи серенжемар кIули гъахру йишвариъ агьалйир удучIвру кьюб йишв ади ккунду. Гьацира кьюб ва кьюбтIан артухъ цIа кIтушвру алатар ади ккунду. ХатIа наан ва фила шулуш, саризра аьгъдар, гьаддиз, мицдар шадлугънан серенжемар кIули гъахру вахтна, учу ёлка наан дивнаш, диди инсанар удучIвуз шлу йишв гьебкри аш, адарш, токран гирляндйирин ва жарабдин сертификат аш-адарш, ахтармиш апIурача. Гьарсаб тешкилатдин руководителариз ва пишекрариз гъуллугъарин телефонарин номерар кайи кагъзар туврача. Баяр-шубарихъдира гъаврикк ккаъбан ляхин кIули гъабхурача.

– Нагагь, хатIалу гьядиса гъабхьиш, сабпи нубатнаъ гьапIну ккунду?

– Эгер наан вуш цIа кабхъиш, сабпи учирнаъ тешкилатарин пишекрари хатIа-сузвалихьан баяр-шубар ярхла дапIну, дурар чIатна адауз чарйир дизигну ккунду. Хъа цIа кабхъувал ахтармиш гъапIу гьарсар пишекри цIа ктIубшвру частназ зенг дапIну, дараматариъ айи вари инсанариз хатIалуваликан мялумат тувну ккунду. Гьацира, тешкилатдин руководителизра мялумат тувну, цIихъди женг гъабхру пишекрар кьабул дапIну ккунду.

– ЦIа кабхъувалин хатIасузвалиан агьалйирин аьгъювалар артухъ шула, пуз шулин? Сарун фициб профилактикайин ляхин кIули гъабхурачва?

– Ав, йислан-йисаз агьалйириз айи аьгъювалар артухъ шула. Жюрбежюр тешкилатарин руководителари учу ахтармиш гъапIу нукьсанвалар терг апIура. Гизафси хусуси дилаварчйири, думу нукьсанвалар дархьбан бадали, чарйир агура. Хъа гьюкуматдин тешкилатариз читинди алабхъура. ЦIа кабхъбан хатIасузвализ пулин дакьатар лазим ву. Гъябгъюрайи йисан Дербент шагьриъ 19 цIа кабхъувалин дюшюшар гъахьну. Дурарин шубубпи пай – агьалйирин хуларик цIа кабхъувал вуйи. Дицдар гьядисйир цIийи йисан дархьбан бадали, ухькан гьарсар мугъаятди духьну ккунду. Газ дизигнайи хулариъ айи пичариз гьар йисан дилигну, дурар къайдайиз духну ккунду.

Гьаддиз учу вари лазим вуйи мялуматарихъди агьал-йир таниш апIури, газатарин, телевидениейин журналистарихъди аьлакьйир уьрхюрача ва Интернетдин жюрбежюр сайтариъ мялуматар туврача.

– Чухсагъул Рустам Аьбдулаевич! Му рягьят дару цирклиъ зегьмет зигурайи увуз ва яв пишекрариз ич газатдин коллективдин терефнаан хъуркьувалар ва гъюрайи ЦIийи йисахъди тебрик апIури, сагъ'вал ва хушбахтвал ккун апIурча!!!

Комментарии:

f1 in1 ok1 t1 v1 y1

Top