ГлавнаяИнтервьюПише – вахтниинди кюмекназ хъуркьуб

Пише – вахтниинди кюмекназ хъуркьуб

1 1 1 1 1 1 1 1 1 1 Рейтинг 4.75 (2 Голосов)

27-пи декабрь – МЧС-дин гъуллугъчйирин Йигъ

77

Жилиин гизаф пишйир ал ва дурарикан гьарсаб инсанариз чан саягъниинди лазим ву. Хъа МЧС-дин гъуллугъчйирин пише аьжайибнан ву. Думу, пишеси, бедбахтвалиъ ахънайидариз вахтниинди кюмекназ гъювал, дурарин дерд, иццрушин гьисс апIувал ву. МЧС-дин гъуллугъчйирин пише, статистикайи улупурайиси, хатIалувалиан кьюбпи йишв’ин ал. Табиаьтдин бедбахтвалин дюшюшариъра, хал-йишвак цIа кабхъиганра, рякъяриъ автотранспортдин хатIалу ва гьацдар жара дюшюшариъра МЧС-дин гъуллугъчйир вахтниинди кюмекназ хъуркьуз буржлу ву.

Мялум вуйиси, гьар йисан ихь уьлкейиъ декабрин 27-диъ МЧС-дин гъуллугъчийин Йигъ къайд апIура. Думу машквар йигъ 1995-пи йисан тяйин гъапIуб ву. Хъа МЧС бедбахтвалин читин дюшюшариъ ахъдариз кюмек тувбан пишекарвалин гъуллугъси яратмиш гъапIуб ву.

Чпин пишекарвалин машквран улихь узу РД-йин МЧС-дин Табасаран райондиъ айи цIа кабхъуваларихьан уьрхбан 23-пи нумрайин частнан начальник, айтIан гъуллугънан капитан Акиф Аьлипашаевдихъди гюрюшмиш гъахьнийза. Думу гъуллугънаъ цIийиди тяйин дапIна. Хъа улихьди, яна 2012-пи йислан мина, начальникдин заместитель вуйи. Дидиз улихьна шубуд йисан Дербентдиъ цIа ктIубшврурин гъуллугънаъ гъилихну. Акиф Аьлипашаевич чан ляхин ужуди аьгъю, дикъатлу ва коллективдин гъайгъушнаъ айи кас ву.

РФ-дин РД-йиъ айи ФПС-диъ цIа кабхъуваларихьан уьрхбан 23-пи частнан ляхин ужуб терефнахъанди къайд апIура.

– ЦIа кабхъувалин дюшюшарихьан уьрхбан 23-пи нумрайин част Табасаран райондиъ 1988-пи йисан яратмиш гъапIну. Гъи душваъ ужуб тажруба айи 25 кас лихура. Хъа техника жигьатнаан тяминваликан улхуруш, учуз кьюб – «Зил» машиндин бинайиинди 2,5 куб ва «Урал» автомобилин бинайиинди 5,5 куб шид гъабхру автоцистерна ачуз. Гьар йигъан суткайин арайиъ дежурство хьур цIа ктIубшврури ва кьюб машинди кIули гъабхура.

Ав, цIа ктIубшврударин ляхин гьарган психика жигьатнаан гъизгъин гьялнаъ айиб ву. Гьаддиз душваъ лихурайидарин беден жигьатнаан гьязурлугвализ аьхю фикир тувра: гьаммишан вердиш’валин серенжемар гъахура, цIа ктIубшвбаан аьгъювалар артмиш ва техникайиз гъуллугъ апIура.

7711

– Пишекарвалин дережа за апIбаз, цIа кабхъувалин улихьишв бисбан меселйиризра асас фикир туври шулча, – давам гъапIнийи Акиф Аьлипашаевди. Гьадму метлебниинди, ич частназ бицIидарин экскурсйир тешкил апIури, кми-кмиди «Ачухъ раккнарин йигъар» гъахури ва дурариз цIа ктIубшврударин гъуллугънакан ва цIа кабхъувалихьан уьрхбан месэлйирикан ктибтури шулча. ДумутIанра савайи, жара гъуллугъарин вакиларихъди, гъуларин поселенйирин администрацйирин главйирихъди сатIиди мектебариз гъягъюри шулча. Аьхиримжи вазли, месела, райондин 8 мектебдиъ дицисдар гюрюшар кIули гъухунча.

Райондиъ 2018-пи йисан цIа кабхъувалин дюшюшар фукьан гъахьнуш, фицдар дюшюшар гизафди алахьураш ва фицдар себебариан дурар шулаш ктибтури, Акиф Аьлипашаевди мялум гъапIнийи:

– 2018-пи йисан Табасаран райондиъ цIа кабхъувалин 53 дюшюш гъахьну, дурарикан 24 агьалйир яшамиш шулайи хуларик цIа кабхъбахъди аьлакьалудар вуйи. ЦIа кабхъувалин варитIан аьхю дюшюш Кьюракк гъулаъ гъабхьнийи. Душваъ хулар гъургнийи. Къайд апIуз ккундузузки, ккудубшу йисан тялукь вахтна хуларик цIа кабхъувалин дюшюшар анжагъ 7 вуйи. Думу жюрейин цIа кабхъувалин дюшюшар 17-диинди артухъ гъахьну. Автомобиларик цIа кабхъбан дюшюшарра сачтIан артухъди ву. Дурар тялукь вуди 4 ва 7 ву. Автомобиларик цIа кабхъбан гизаф дюшюшариъ водителарин машинариъ духьну ккуни цIа ктIубшвбан дакьатар адарди гъахьну.

Цци агьалйирин гъеебццу укI уьбхюрайи йишварик цIа кабхъбан 6 дюшюш гъахьну. Му дюшюшар ихь ватанагьлийири гъеебццу укI уьбхбан къайд-йир тамам дарапIувалиан арайиз гъафну – гизафси гъеебццу укI яшамиш шлу хуларик кабсну ясана хулариз лап багахь вуди уьбхюз дивру.

Ич асас вазифара цIа кабхъувалин дюшюшариъ сабпи нубатнаъ агьалйир уьрхювал вуйич. ЦIа кабхъбан тахсиркар гизафна-гизафси учв инсан вуди шулу. ХатIасузвал уьбхбан тIалабарикан гьархну, наан-вушра, фици-вушра цIа кичIибгну ккундар, думу терефнаан бицIидарра гюзчиваликк гъитну ккунду,

– гъапнийи Акиф Аьлипашаевди. – Гьамус кьюрд ву. Аьхъю вахтна пичариъ цIийир итрайиган, цIа кабхъувалин къурхулувал хъана заануб шулу.

Думу вахтна гьарсар касди пичар албагбан, пичариъ цIийир итбан вари тIалабар хъайи-хъайиси тамам дапIну ккунду. Газдин ва электричест-войин алатар рас дапIнади ккунду, гьацира баяр-шубар хулаъ ялгъузди, аьхюдарин ул алдарди гъитну ккундар. Узуз сабсанубдикан пуз ккундузуз. Гизаф касариз читин аьгьвалатнаъ наана ва фици илтIикIуруш, аьгъдар. КIваин апIураза, МЧС-диз телефондиан саб вуйи «112» номериинди илтIикIуру.

Акиф Аьлипашаевичди ич сюгьбатнаъ, чпихь лихурайидарикан улхури, асас цIа ктIубшврудар вуйи Къурбан Рамазановдин, Абулферз Герейхановдин, отделениейин командир Казим Клинжевдин ва жарадарин ччвурар къайд гъапIнийи. Дугъу гьацира улихьна чпихь лихури гъахьи цIа ктIубшвбан 23-пи частнан ветеранарихъди аьлакьа уьбхюрайиваликан гъапнийи.

Бедбахтвал наънан ва фици улубкьуруш, улихь ккимиди пуз шулдар. Думу наан-вушра, шлиин-вушра улубкьуз мумкин ву. Хъа гьациб аьгьвалатнаъ ахъдариз вахтниинди кюмекназ хъуркьувал – му баркаллу ляхин ву.

Комментарии:

f1 in1 ok1 t1 v1 y1

Top