ГлавнаяКультураДербент Пальмирайиз илтIибкIна

Дербент Пальмирайиз илтIибкIна

1 1 1 1 1 1 1 1 1 1 Рейтинг 5.00 (1 Голос)

пальмира3

Ноябрин 24-пи йигълан башламиш дапIну, Дербент шагьриъ Сирияйин дявдикан хъайи-хъайиганси ктибтурайи «Пальмира» кIуру художествойин кинофильм адабгъбан ляхнар кIули гъягъюра.

Думу Урусатдинна Сирияйин проект ву. Кинофильмдиъ Дагъустандиан вуйи духтрикан ктибтура. Чан урхурайи риш террористарин жергйириъ ахъну Сирияйиз гъягъбалан кьяляхъ, думу агури, террористарин бацаригъян жвуван риш азад апIувал метлеб вуди, духтирра Сирияйиз гъягъюру. Кинойин тешкилатчйири Сирияйихъди аьлакьалу сюжетар Дербентдиъ адагъуз йикьрар гъапIну. Гьацира думу кино адабгъбан ляхнар Сирияйиъра, Турцияйиъра ва Санкт-Петербург шагьриъра кIули гъягъиди.

Кинофильм 2019-пи йисан прокатдиз тувуз планламиш дапIна. Дидин бюджет 2 миллиондихьна доллар ву, дурарикан гьацI миллион долларар Сирияйи жара апIура.

Улихьнаси республикайин журналистар Дербент шагьриз кино адабгъурайи йишвариина гъушну ва режиссер, сценарий гъибикIу авторарикан сар вуйи Иван Болотниковдихъди ва дидин кIулин игитарин ролар уйнамиш апIурайи актерарихъди гюрюшмиш гъахьну.

Думу йигъан кинофильм адабгъбахъди аьлакьалу гьяракатар Дербентдин мягьялиъ ерлешмиш духьнайи кюгьне вахтарин жиларин гьямамариъ гъахурайи. Дупну ккундуки, гьямамариъ учIвбан бадали, гъвандин умбрариан исина жилизди душну ккундийи. Учу мушваъ учIвубси, кюгьне вахтарин гьава гьисс гъапIнийча. Белки, гьаддиз му мучIу йишваъ жандик мяхъ кубчIврубсиб гъагъи гьава ва саб фициб-вуш гафариинди ачухъ апIуз даршлу аязнан мичIливал гьисс шуйи. Вахт-вахтарик аьхю сес тувру микрофондихъан: «Внимание…камера…мотор!» – кьатI’и табшуругъ ебхьуйи. Актерар ролиъ учIвуз хъю-гъюйи.

Иван Болотниковди ктибтганси, кинофильм адабгъбан кьаст дугъаз, дагъустан жвувкан макьала гъурхиган, гъафнийи. Макьалайиъ дагъустанлуйин хпир чан шубур ришра хъади Сирияйин аьтрафариин гьяракатнаъ айи террористарин ИГИЛин* дестейиз гъушну. Жилирра, чан веледар азад апIбан метлебниинди, Сирияйиз гъягъюру. Дугъан хпир Сирияйиъ гъузру, хъа адаш чан шубарихъди Дагъустандиз кьяляхъ хътакуру.

Продюсер, режиссер ва сценарист гьадму гьядиса гъабхьи йишвариз душну, душван аьгьвалатнан шагьидар гъахьиган, сценарий сацIиб гьюдюхюз мажбур гъахьнийи.

Адашдин роль Венгрия гьюкуматдин актер Гезы Морчанийи уйнамиш апIура. Дугъан фикриинди, кинофильмдин асас игит ижми юкIв айи дирбаш инсан ву. Думу, чаз алахьру бедбахтваларикан хабар ашра, багъри риш азад апIуз рякъюъ учIвра.

Шуран роль уйнамиш апIурайи Санкт-Петербургдиан вуйи актриса Екатерина Крамаренкойиз Дагъустан лап кьабул дубхьнайи. Му роль дугъан пишекарвалин рякъюъ асасуб ву. Режиссери мялум гъапIганси, му проектдиъ, Урусатдинси, Венгрияйин, Литвайин, Польшайин, Азербайжандин актерарра иштирак шула. Кинофильмдин жикъи кьатариъ ва гизаф инсанар уч духьнайи йишварихь ролар уйнамиш апIбаъ дагъустанлуйирра иштирак шула. Кинофильмди фициб машгьурвал гъазанмиш апIуруш, вахтну улупиди. Хъа Дагъустанди уьлкейин кинематографдин тарихнаъ нубатнан ражари чан шил гъибтди.

*Урусатдин аьтрафариин къадагъа дапIнайи террорист-валин тешкилат.

Комментарии:

f1 in1 ok1 t1 v1 y1

Top