ГлавнаяКультураТарихдихъна хътакури

Тарихдихъна хътакури

1 1 1 1 1 1 1 1 1 1 Рейтинг 3.50 (2 Голосов)

1057c61a b846 49ce bc37 46c1a92cb60e

Гьаму улихьнаси Дербент шагьриъ айи социалинна педагогикайин институтдиъ табасаран культурайиз бахш дапIнайи серенжем кIули гъубшну. Мярака тешкил апIбак табасаран театрин пишекрарира лайикьлу пай кивну. Серенжемдиъ институтдин ректор Людмила Жавадова, дугъан насигьятчи, аьлим, профессор Мягьямед Юсуфов, мялимар, студентар ва гьацира Дербент шагьриъ яшамиш шулайи табасаран ва азербайжан халкьдин шаирар иштирак гъахьну.

Серенжем ачмиш апIури, Людмила Жавадмирзоевнайи гъийин девриъ ихь бабан чIалар, аьдатар ухьу дюрхну ккунивал тасдикь гъапIну ва лезги, азербайжан халкьарин культурйиризра бахш вуйи мицдар серенжемар гъахувал планламиш дапIнайиваликан гъапну.

Табасаран театрин директорин заместитель, шаир Эльмира Аьшурбеговайи му институтдиъ ихь халкьдин баяр-шубар гизаф айиваликан, душваъ гьацира ихь ватанагьли, аьлим Мягьямед Юсуфовра лихурайиваликан, милли чIалар уьрхбан бадали, му тешкилатди хайлин ляхин гъабхурайиваликан гъапну. Э.Аь.Аьшурбеговайи уч духьнайидар аьхиримжи вахтна театри диву спектакларихъди таниш гъапIну ва чан тазади удубчIвнайи «Лизи ваз» кIуру ва Рягьим Рягьмандин, Мягьямед Мягьямедовдин китабар институтдин библиотекайиз бахиш гъапIну. Шаири уч духьнайидар Шамиль Кьазиевдин ва Юсуф Базутаевдин поэзия-йихъдира таниш гъапIну.

Кюгьне йисарин палтар алахьну, студентари табасаран халкьдин риш хъаъругандин, «мархьлиз дих апIбан» ва гьацира жара аьдатар улупну, халкьдин мяълийир гъурхну, улихьдин вахтнан ялхъвнар ва дуланажагъдиъ ишлетмиш апIури гъахьи алатарихъди, ляхнарихъди, хурагарихъди тамашичйир таниш гъапIну.

Чан удучIвну улхбаъ Мягьямед Юсуфовди му серенжем кIули гъябгъюрайивалиин чав гизаф рази вуйиваликан, табасаран дишагьлийири гъурху халачйири харижи уьлкйирин музеяр балгурайиваликан, багъри чIалнахьна, культурайихьна маракьлувал ади яшамиш духьну ккуниваликан гъапну.

Дербент шагьрин 17-пи мектебдиъ табасаран чIалнан дарсар киврайи Д.С.Ших-рягьимовайи ццийин йисан ноябрин аьхириъ, учвра иштирак духьну, Вели Загьировдин тешкиллувалиинди «Табасаран чIал кивбан методикайин бязи месэлйир» кIуру методикайин пособие адабгънайиваликан мялумат тувнийи ва ихь абйирилан гъубзу ирс уьбхбаъ гьарсари зегьмет дизигну ккунивал тасдикь гъапIну.

Му йигъан Ш.Керимовайи, Гъ.Гьяжиибрагьимовайи, Р.ТIагьировайи, М.Гьяжие-вайи, Т.Шамсудиновайи уч духьнайидар чпин шиъра-рихъди таниш гъапIну. Мяракайиъ азербайжан халкьдин вакилар – шаирар Зейнаб Дербендли ва Жалгъандиан вуйи Сафият иштирак гъахьну. Дурарира чпин яратмиш апIбарикан ктибтну ва шиърар гъурхну.

Шагьрин 12-пи мектебдиъ урхурайи Руслан Маллаевди серенжемдиз уч духьнайидар чан урус чIалниинди гъидикIу шиърарихъди таниш гъапIну ва Э.Аьшурбеговайи табасаран чIалназ илтIибкIу Р.Гьямзатовдин «Кьарнийир» кIуру мяълира гъапIну.

Серенжем ккебгъну ккудубкIайиз, думу кIули гъабхурайидари Табасарандин табиаьтдихъди таниш апIру слайдар улупури, халкьдин тарихдикан ктибтну.

Дупну ккундуки, му мярака лезги миллетдин вакил, му тешкилатдиъ лихурайи Зубейда Рефиевайин тешкиллувалиинди кIули гъубшну. Мицдар серенжемари ихь халкьар сатIи апIура ва жвуван тарихдихьна гьюрматлувалиинди илтIикIуз кюмек тувра.

Комментарии:

f1 in1 ok1 t1 v1 y1

Top