Дагъустандин мукьмар

1 1 1 1 1 1 1 1 1 1 Рейтинг 5.00 (1 Голос)

888

Ихь дагълуйирин яратмиш апIбан бегьер фольклор ву. Думу Дагъустандин жюрбежюр халкьари арайиз гъабхиб ву. Махъвар, мяълийир, дургъунагъар, ялхъвнар, мукьмар му халкьдихьан тмуну халкьдихьна гъягъюри ва гьарсари чаз хас вуйиб капIри, ишлетмиш апIури гъахьну. Гьаддиз гьарсаб миллетдин фольклорик дагълариъ яшамиш шулайи вари миллетарин пай ка. Аьсрариинди гъубзу думу багьалу девлетнахьан ярхла хьуз ухьуз ихтияр адархьуз.

Декабрин 25-пи йигъан Дагъустандин Огни шагьрин тарихдинна аьтрафар аьгъю апIбан музейиъ халкьдин музыкайизна мукьмар йивру алатариз бахш дапIнайи «Дагъустандин мукьмар» кIуру мярака кIули гъубшну.

Серенжем му шагьрин жямяаьтлугъ палатайин член Сулейман Фатялиевди тешкил гъапIуб вуйи. Му йигъан музейиз искусствойин 1-пи нумрайин мектебдин халкьдин отделениейин мялим, мяълийирин устад Ирази Гьяжимирзоев, 2-пи нумрайин искусствойин мектебдин директор Расим Кичибегов, душваъ саз, тар йивуз улупурайи мялим Ринат Мягьямедов, кларнет йивуз улупру мялим ТIалиб Загьиров, вокалин мялим Гьядижа Аьзизова дуфнайи.

Серенжем ачмиш апIури, музейин пишекрар вуйи Чимназ Мехтиевайи ва Назлуханум Гьяжиевайи кюгьне вахтариан гъубзнайи фольклори ихь халкьар сатIи апIури, баяр-шубариз ватанпервервалин тербия тувбаъ кюмек апIури гъахьиваликан, багъри юрднахьна вуйи ккунивал артмиш апIури гъахьиваликан гъапну.

Сулейман Фатялиевди ва дуфнайи мялимари чпин музыкайин алатарикан, думу алатарин тарихдикан, искусствойин пише ктабгъбакан ктибтну ва уч духьнайидар мукьмарихъди, мяълийирихъди таниш гъапIну.

Му йигъан серенжемдиъ мялимарин тешкиллувалиинди Кьибла Дагъустандиъ айи вари чIалариинди мяълийир гъапIнийи.

Сулейман Фатялиевди гъапиганси, мицдар серенжемари жвуван халкьдин культура-йихьна илтIикIуз, дидин гъавриъ хьуз кюмек апIуру. «Гъийин девриъ ихь баяр-шубар халкьди яратмиш гъапIубдихьан ярхла шула. Телевизориан улупура-йибди, Интернетдиъ айибди дурарин тербияйиз манигъ’вал апIура. Узу йивурайи мукьмарин алатдиз балабан кIуру. Армян халкьди му алатдиз дудук кIуру», – ктибтнийи Сулейман Фатялиевди.

Мяракайиз музейин директорин вазифйир кIули гъахурайи Наргиз Нурягьмедовайи ужуб кьимат тувнийи. «Сулейман Фатялиевичди узуз шиклар зигуз улупру дарсар кивунзуз. Му кас вари терефариан зигьимлу кас ву», – кIура музейин руководители.

Мукьмар йивуз, мяълийир апIуз, шиклар зигуз, концертар, сумчрар кIули гъахуз аьгъю Сулейман Фатялиевди мяракайин аьхириъ Ирази Гьяжимирзоевдихъди (дурар лезги халкьдин вакилар ву) утканди Аьгьмед Уруджевдин «Табасаран» кIуру ва жара мяълийир гъапIнийи. Му йигъан серенжемдиз гъафи аграрный коллеждин студентариз, шагьрин мектебариъ урхурайи баяр-шубариз ва дидин вари иштиракчйириз му кюгьне мукьмариз бахш дапIнайи серенжем кIваинди гъубзди.

Комментарии: