ГлавнаяОбразованиеМектеб цIийи алапIура

Мектеб цIийи алапIура

1 1 1 1 1 1 1 1 1 1 Рейтинг 5.00 (1 Голос)

img 3307

Ноябрин 14-пи йигъан Табасаран райондин глава Алавудин Мирзабалаев ТинитI гъулан кьялан мектебдиъ, гъахурайи расвалин ляхнар ахтармиш апIуз гъушну.

Ухьуз мялум вуйиси, РД-йин Глава В.Васильевдин табшуругъниинди республикайиъ «100 мектеб» проект уьмриз кечирмиш апIура. Проектдин метлеб – уьмуми образованиейин тешкилатариъ рас апIбан ляхнар гъахувал ву. Мектеб республикайин бюджетдиан жара дапIнайи 2 миллион манатдин ва ерли бюджетдиан, спонсорарихьан уч гъапIу дакьатарихъ рас апIура. Му гъалаъ гъулан мектбедин коллектив ва жямяаьтлугъ спонсорар гъахьну.

Гьамусяаьт мектебдиъ манишин тувру гъурулуш албагбан, котельный тикмиш апIбан, йирси унчIвар гъядягъну цIийдар гъивбан, классарин кабинетарикк ккайи кьул дигиш апIбан ляхнар жанлуди гъягъюра.

Райондин глава Алавудин Мирзабалаев ляхнар гъахурайи тешкилатдин вакил Олег Мирзахановдихъди мектебдин гьарсаб мертебайиъ айи вари кабинетариз душну, апIурайи ляхниз гъилигну, тикилишчйирихъди дапIну ккуни ляхнарикан гъулхну. Райондин кIулиъ айири мектебдиъ рас апIбан ляхнар вахтниинди ва ужуб ери ади дапIну ккуниваликан гъапну.

Мектебдин директор Аьбдусалам Гьясановди къайд гъапIганси, ТинтIарин мектеб айи дарамат 1970-пи йисан «Рубас» совхоздин администрацияйин хуларси тикмиш гъапIуб вуйи. Гьацира улихьна больница ади гъабхьи дараматра мектебдиз тувнийи. Гьаддихъан мина мектебдиъ рас апIбан ляхнар зат духнадайи.

«Аьхиримжи йисари райондиъ 4 цIийи мектеб тикмиш ва 36 мектеб рас дапIна. Му жюре ляхин давам апIидихьа. Мектебдин цIийи дараматар ишлетмиш апIуз хъюгъиган, баяр-шубариз деврин тIалабриз гъилигу шартIариъ урхуз мумкинвал хьибди», – гъапну А.Мирзабалаевди.

О.Мирзахановди чан терефнаан мектеб рас апIбан ляхнар улупнайи вахтназ ккудукIуз гаф тувну.

Комментарии:

f1 in1 ok1 t1 v1 y1

Top