ГлавнаяОбразованиеДагъустан чIалариинди китабар адагъура

Дагъустан чIалариинди китабар адагъура

1 1 1 1 1 1 1 1 1 1 Рейтинг 5.00 (1 Голос)

WhatsApp Image 2018 08 04 at 12.15.54

Декабрин 17-пи йигъан Дагъустандин Глава Владимир Васильевдин регьберваликкди республикайин Правительствойиъ ктабхъурайи йисан гъапIу ляхнин натижйир йивбан ва 2019-пи йисан тамам апIру ляхнарин планариз лигбахъди аьлакьалу месэлйириан яркьу совещание кIули гъубшну.

Образованиейин гъурулушдиъ арайиз дуфнайи дигиш’валарикан ва чпи кIули гъахурайи ляхнарикан ктибтури, РД-йин вице-премьер – РД-йин образованиейинна илимдин министр Уммупазиль Уьмаровайи думу совещание-иъ къайд гъапIганси, гележегдиъ Минобрнаукийи мектебариъ бабан чIалар аьгъю апIбаз асас фикир тувди. Республикайин мектебариъ урхурайи баяр-шубариз Дагъустандин халкьарин миржиб чIалариинди вуйи 160 агъзурихьна учебникар гьязур апIура. Думу китабар ЦIийи йис улубкьайиз мектебариз рукьиди.

Уммупазиль Уьмаровайи гьацира 2019-пи йисан федералин бюджетдиан республикайин образованиейин цирклин артмиш’вализ 8,5 млрд манат жара дапIнайиваликанра мялум гъапIнийи. Мисалназ, гъябгъюрайи йисан думу цирклиз жара дапIнайи дакьатарин кьадар 1,5 миллиардтIан дайи. Зиихъ къайд дапIнайи дакьатарин кюмекниинди гъюру йисан 32 бицIидарин цIийи багъар тикмиш апIуз планламиш дапIна.

Республикайин шубуб сменайин къайдайиъди лихурайи мектебарин месэлара, министри къайд гъапIганси, 2021-пи йисаз тамамди гьял апIиди.

Республикайин Глава Владимир Васильевди гъулан мектебар заан дережайин пишекарвал айи гъуллугъчйирихъди тямин апIувалин месэлара учIрударикан саб вуйиб мялум гъапIну.

«Эгер мумкинвал аш, гележегдин мялимар, вузарин сабпи курсариан хъюгъну, заан дережайин пишекарвал туври, гьязур апIурхьа. Сабсана: гьацдар жигьил пишекрариз маважиб за апIбаканра фикир дапIну ккунду. Гъи гьам аьхю гъулаъ лихуз гъушу вая лап дагълариъ ерлешмиш дубхьнайи бицIи гъулан мектебдиъ лихурайи мялимдиз кюмек вуди туврайи пул 1 млн манат ву. Ухьу агьалйир, ужуб образование ва медицинайин мюгькам кюмек абгури, гъулариан удучIвну дурушбан бадали, душвариъ гъулай шартIар яратмиш дапIну ккунду. Му месэлайиинра лихидихьа»,

– гъапну Владимир Васильевди.

Китабарин месэлайихъна хътакури, республикайин Главайи китабар абйир-бабарихьди масу гъадагъуз гъитрайивал дебккуз, библиотекйирин фондариан вуйи китабар масу туврайи туканар аш, ашкар апIуз ва му месэлйир гюзчиваликк гъитуз табшурмиш гъапIну.

Комментарии:

f1 in1 ok1 t1 v1 y1

Top