ГлавнаяОбразованиеУь. Хасбулатов: «100 мектеб» варитIан ужуб проект ву»

Уь. Хасбулатов: «100 мектеб» варитIан ужуб проект ву»

1 1 1 1 1 1 1 1 1 1 Рейтинг 5.00 (1 Голос)

Декабрин 19-пи йигъан «Дагъустан» РИА-йин конференц-йир гъахру залиъ «Ачухъ гьюкум» проектдин дахилнаъди РД-йин экономикайинна аьтрафарин артмиш’валин министр Уьман Хасбулатов республикайин журналистарихъди гюрюшмиш гъахьну.

Министри, чан удучIвну улхуб ккебгъри, 2019-пи йисан республикайин инвестицйирин программйириз ццийин йисантIан 4 ражари артухъди – 16 миллиард – дакьатар жара дапIнайиваликан мялум гъапIнийи.

Ухьуз варидиз мялум вуйиганси, цци республикайиъ «100 мектеб» кIуру проект уьмриз кечирмиш апIура. Министрин гафариинди, му проект ужудар проектарикан саб ву. Проектдиъ улупнайидар 100 мектебтIан даршра, гъийин йигъаз дидин дахилнаъди 117 мектебдихъди рас апIбан ляхнар гъахуз конт-рактар йитIна ва саки вари мектебариъ расвалин ляхнарра аьхирихъна гъюра.

«Проект уьмриз кечирмиш апIуз республикайин бюджетдиан 200 миллион манат жара гъапIнийи. ИкибаштIан, му кьадар улупнайи вари мектебариз тамамди гьубкIруб дайи. Гьаддиз проектдин дахилнаъди мектеб рас апIурайи гъуларин, шагьрарин бюджетаринра дакьатар ишлетмиш апIури ва гьацира меценатарин кюмекнииндира проект кечирмиш апIувал аьхирихъна хура. Му месэлайин гьякьнаан республикайин Главайихъдира гаф-чIал гъапIунча ва хъайисанра проект давам апIиди. Гъюруйисаз проектдиз бюджетдиан 300 миллион манат жара дапIна ва 150 мектеб рас апIуз улупна»,

– мялум гъапIнийи министри.

Министрихъди гъубшу конференцияйиъ ич газатдин мухбири Хючна гъулаз убхъру шид филан зигуруш ва райондиъ Сбербанкдин банкоматарин кьадар артухъ апIуз шулуш, гьерхнийи.

Министри туву мялуматариинди, Хючна гъулаз шид зигувал республикайин экономикайинна аьтрафарин артмиш’валин Министерствойин программ-йирик кабхърадар. Хъа РФ-дин тикилишчивалин Министерствойин Урусатдин агьалйир рягьятвалихъди ва яшайишдинна коммуналин шартIарихъди тямин апIбан гьюкуматдин программа а.

«Гьадму программайиинди Дагъустан Республикайиз 146 миллионна 600 агъзур манат жара дапIна. Му кьадар цIиб вушра, думу 2019-пи йисан чарасуз ляхин ккебгъну ккуни районарин арайиъ жара апIиди. Хъа 2020-пи йисаз программайин дахилнаъди ляхнар гъахуз 300 миллион жара апIиди. Гьаддиз Табасаран райондин администрация РД-йин Минстройдиз илтIикIну, прог-раммайик Хючна гъулаз шид зигувалра капIуб тIалаб дапIну ккунду.

Хъа кьюбпи суалин гьякьнаан пуз ккундузузки, мициб аьгьвалат Табасаран райондиъси, имбуну районариъра а. Му месэлайин гяькьнаан учухьна кми-кмиди агьалйир илтIикIура. Асас вуди алабхъурайи гъагъишин банкоматариъ пул адрувал ву. Му месэлайин гьякьнаан учу гьаммишан Сбербанкдихъди гафар-чIалар апIурача, хъа гьелелиг ляхин 100% тамам дубхьнадар»,

– аьлава гъапIнийи министри.

Комментарии:

f1 in1 ok1 t1 v1 y1

Top