Имтигьнарин улихьна вуйи гюрюшар

1 1 1 1 1 1 1 1 1 1 Рейтинг 5.00 (1 Голос)

326

Ихь мектебарин выпускникари гьар йисан ЕГЭ ва ОГЭ тувра. Ццийин урхбан йисан аьхириъра, шаксузди, тувди. Дурар тувбан къайдйир фицдар ву, дурар тувуз райондин мектебариъ фици гьязур шула, КИМариъ дигиш’валар духьнайин, баяр-шубари имтигьнар тувбаъ абйир-бабарин гъайгъушнар фицдар духьну ккунуду? Гьаму ва жара месэлйирин гьякьнаан Табасаран райондин образованиейин Управлениейин пишекрар аьхиримжи йигъари выпускникарихъди ва дурарин абйир-бабарихъди гюрюшмиш шула. Дицисдар гюрюшар гъубшу гьяфтайиъ Хючна ва Жулжагъ гъуларин мектебарин выпускникарихъди ва дурарин абйир-бабарихъди гъахьну.

 

3695

Хючнаъ кIулиъ гъубшу серенжемдиъ райондин глава Алавудин Мирзабалаев, райадминистрацияйин главайин заместитель Аьбдулвагьаб Аьбдулов, вахтназ вуди райондин образованиейин управлениейин начальникдин вазифйир тамам апIурайи Бахиш Аьгьмедов ва образованиейин управлениейин жара гъуллугъчйир, образованиейин идарйирин кIулиъ айидар, райцентрин мектебариъ урхурайи выпускникарин абйир-бабар иштирак гъахьну. Гьаму йисан райондиъ 11-пи классарин 418 урхурайири ва 9-пи классариъ урхурайи 745 касди тялукь вуди ЕГЭ ва ОГЭ тувбанди ву. Имтигьнар шубуб пунктдин – Хючнаарин сабпи нумрайин мектебдин, Хянягъ гъулан ва ТIаттил гъулан мектебдин бинайиинди гъахиди.

«Гьюкуматдин саб вуйи имтигьян – му урхурайидарин улихь дийибгънайи аьхю жавабдарвалин месэла ву. Дидихьна гьязур хьпаъ, мялимариси, абйир-бабарира аьхю роль уйнамиш апIура. Гьаз гъапиш, РФ-диъ образованиейин къанундиз асас вуди, мялимарси, абйир-бабарра образованиейин гьяракатнан иштиракчйир ву. Гьаци, дурари саб пай гъайгъушнар чпиина гъадагъну ккунду»,

- гъапнийи Алавудин Мирзабалаевди.

Серенжемдиъ вахтназ вуди райондин образованиейин управлениейин начальникдин вазифйир тамам апIурайи Бахиш Аьгьмедов, методист Къисханум Мягьмудова, «Юлдаш» ЦО-йин ва Хючнаарин сабпи нумрайин мектебдин мялимар Гьаваханум Байрамялиева ва Сельми Аьбдуризакьова удучIвну гъулхнийи.

Жулжагъ гъулан культурайин Хулан зализ мектебдин 9-пи классдин (24 кас) ва 11 пи классдин (24 кас), гъунши Дагъни гъулан мектебдин выпускникар (4 кас), дурарин мялимар, гьацира абйир-бабар уч гъахьнийи.

Серенжемдиз уч духьнайидарин улихь райондин образованиейин управлениейин начальникдин заместитель Ольга Красноженова удучIвну гъулхнийи. Гюрушдиз аьхириъ дугъу урхурайидарин абйир-бабарин суалариз жавабар тувнийи.

Шиклариъ: 1. Жулажагъ гъулан культурайин Хулаъ абйир-бабарихъди ва выпускникарихъди вуйи гюрюшдиз дуфнайидар. 2. Ольга Красноженовайи выпускникариз ва дурарин абйир-бабариз ЕГЭ-йихъди ва ОГЭ-йихъди аьлакьалу месэлйирикан ктибтури.

Комментарии: