ГлавнаяОбществоИнсанди чав дибиснайи йишв балгуру

Инсанди чав дибиснайи йишв балгуру

1 1 1 1 1 1 1 1 1 1 Рейтинг 5.00 (1 Голос)

Гьюрматлу ватанагьлийир! Ихь багъри «Табасарандин нурар» газатдин 2018-пи ва 2019-пи йисарин тираждин фаркьвал гъябкъган, узу лап тяжуб гъахьунзу. Узуз аьгъювалиинди, газатдин маракьлувал ис дубхьнадар, аьксина, швнубна-саб ражари за дубхьна.

Хъа тираж цIиб дубхьнайивалин себеб фу вуйкIан? – Газатдин машариъ гъитIирккурайи учIру месэлйирихьна вуйи ихь вижнасузвал, гьадму учIру месэлйир ухьуз хайирлуди кIулиз адагъуз зегьмет зигуз даккнивал, гьяракатниинди гъябгъюрайи уьмриъ жвув улупуз, дидик жвуван лайикьлу пай кивуз аьдати темпелвал. Газат – табасаран медениятдин саб асас циркил ву. Гьадму цирклиз ужуб бегьер тувуз ухьу кюмек дарапIиш, ихь медениятра, заан дережайиъ дебккну, тамам вуйиб хьибдар. Йисан аьхириъ ихь газатдин редакцияйи ухьуз, газат урхрудариз – думу подписка апIрудариз, кьимат дивра ва ухьухъди мани рафтар уьрхюз зегьмет зигура, хъа ухьу…?

Гьюрматлу редакция! «Табасарандин нурар» газатди ихь райондин агьалйир, ихь аргъаж шулайи насил эдеблуди тербияламиш апIбаъ, дурарикан Ватандиз вафалу инсанар хьпаъ аьхю ва эгьемиятлу роль уйнамиш апIурайивал дидин машариъ чап апIурайи макьалйири субут апIура. Дидланра савайи, ихь инсанарин уьмур вари терефарианди ачухъ апIури, халкь районариъ ва республикайиъ гъягъюрайи гьядисйирихъди таниш апIури, бицIидарин багъарилан хъюгъну, кьабидарин яшайишдихьна, дуланажагъдихьна вуйи рякъярикан, гьяракатарикан варидариз ктибтури, газатди учв ихь республикайин жямяаьтлугъдин ва политикайин идара, ихь багъри дакьат ва багьалу дуст вуйивал улупура.

Газатди, чан хусуси фикрар ачухъ апIбахъди сабси, гьарсар касдиз ихь арайиъ чак кайи яратмиш апIбан гьунар ва бажаранвал улупуз, жвуван ккуни инсанарихьна, багагьлуйирихьна, иллагьки дадйирихьна, вуйи мани гьиссар ачухъ апIуз, дурар машкврарихъди, машгьур ва жвуваз багьалу вуйи йигъарихъди тебрик апIуз мумкинвал тувра. Мидланра савайи, ихь газатди кми-кмиди чан машариъ инсанариз шадвал, рягьятвал тувру, юкIв улдубчру, кIваз хуш вуйи зарафат, фикирлу насигьят, маракьлу ихтилат чап апIури шулу. Газатди ихь уьмрин сабкьан тереф ул’ан идипну адар. Амма, гьяйифки, макьалйирин зиин ляхин гъабхувалик, дурариз, дурарин метлеблувализ фикир ва кьимат тувувалик, гафар бушди гъудрузбан бадали, тялукь органари чпин совещанйириъ гьял дапIну, дурар уьмрин гьяятназ кючюрмиш апIувалик гизаф зяифвалар, камивалар рякъюру. Гьаци вуйиган, апIурайи гафаринра, гафар, макьалйир чап апIурайи газатдинра ад, мяналувал, мянфяаьтлувал ис шулу, инсанарин дурарихьна вуйи маракьлувал дубгуру.

Аьзиз дустар! Газатдин уьмур сагъуб хьувал гьадушваъ лихурайи коллективдикан асиллу ву. Гьарсар инсан, ялгъузди вушра, коллективдиъ ашра, гьарган ужуб гафнахъ, лайикьлу тярифнахъ, рюгьламиш апIру ва гьевес капIру насигьятнахъ мюгьтаж вуди шулу. Гьаци вуйиган, узуз ляхниъ жавабдарвал гьисс апIурайи, гьарсариз чаз хас вуйи жилгъа айи, бегьерлу яратмиш'валар кайи, ужудар натижйириинди тафавутлу шулайи ихь газатдин мухбирарин бажаранлу коллективдиз йиз терефнаан кIваантIан вуйи «аферин» пуз ккундузуз. Аьлава вуди, апIурайи ляхниъ хъана заан хъуркьувалар, уьмриъ бахтар, инсандиз варитIан багьалу вуйиб – жандин сагъ’вал учвуз ккун апIураза. Дибиснайи йишваз, тувнайи ччвурназ, апIурайи ляхниз лайикьлу хьувал – му инсандихьан гъазанмиш апIуз шлу кьиматарикан заан кьимат ву. Гьаци инсанди чав дибиснайи йишв балгуру.

P.S. Гьюрматлу Мегьемер Аьлиевич! «Табасарандин нурар» газатдин редакцияйин ляхниз, ич коллективдиз, мициб заан кьимат тувбаз увуз ич коллективдин терефнаан зурба чухсагъул мялум апIурача. Гележегдиъ ич ляхин хъана заан дережайиз адапIуз зегьмет зигидича.

Хъа увуз мюгькам сагъ’вал, хизандиъ гьаммишан саламатвал, яв кIваъ айи вари фикрар, хиялар, умудар кIулиз удучIвувал ккун апIурача.

Комментарии:

f1 in1 ok1 t1 v1 y1

Top