ГлавнаяОбществоГьял дапIну ккуни учIру месэлйир

Гьял дапIну ккуни учIру месэлйир

1 1 1 1 1 1 1 1 1 1 Рейтинг 5.00 (1 Голос)

Марццишин уьбхбан цIийи къайдйир
Ккудубшу йисан декабрин гьацIкьялариъ Дербент шагьриъ чIюрхяр, зирзибил марцц дарапIри ва зирзибил дабхьру йишв’ина дурубхри гизаф вахт гъабхьнийи.

Шагьриъ айи нукьсанваларин гъавриъ хьпан бадали, вари кючйир, тешкилатар, гъирагъар ахтармиш апIурайи шагьрин глава Хизри Абакаров му ляхнин гьякьнаан жавабдарвал гъабхурайи РД-йин табиаьтдин ва табиаьт уьбхбан Министерствойиз швнуб-саб ражну илтIикIнийи. «Экологи-ка» ООО-йин пишекрариз вазариинди маважиб туври адрувал себеб вуди, декабрин 14-пи йигъхъан саркьана пишекар чIюрхяр ва зирзибил гьадабгъуз ляхниз удучIвундайи. Республикайин Правительствойизра му гьядисайикан аьгъю гъабхьнийи, ва му месэла гьял гъапIнийи.

Дупну ккундуки, цци январин 1-пи йигълан мина му вазифйир региондин операториз табшурмиш дапIна. ЧIюрхяр ва ижми жюрейин зирзибил гьадабгъувал фици тешкил дапIнаш ахтармиш апIуз ккунди, узу «Экологика» ООО-йин директор Альберт Черниковдихъди гюрюшмиш гъахьунза.

Альберт Черниковди гъапиганси, му тешкилатди Дербент шагьрин администрацияйин теклифниинди август вазлихъан мина зирзибилихъди аьлакьалу месэлйир гьял апIура. «Январин 1-пи йигълан мина му тешкилатдин юридический адрес Москва шагьриъ а, ва дидин кIулин директор Юлия Бирюкова ву. Тешкилатдиз региондин оператор кIура. Ич вазифйир – чIюрхяр ва зирзибил уч апIувал, гьадабгъувал, думу зарар тувуз даршлу саягъназ хувал ва ичIаъ абхьну, зиълан руг алабхьувал вуйич. Учу 2032-пи йисазкьан му вазифйир кIули гъахуз йикьрар йитIнача», – кIура А.С.Черниковди. Дугъу тасдикь гъапIганси, кючйир ичIиркбан вазифйир тамам апIуз администрацияйи «Городской сервис» ООО тешкилат тешкил дапIна.

Альберт Черниковдин гафариинди, Кьибла Дагъустандиз лазим вуйи техника, цIийи контейнерар багарихьди масу гъадагъиди ва гьацира дурар дивру майднарра тешкил апIиди. ЧIюрхяр ва зирзибил саб-сабдихьан жара апIбан бадали, тялукь комп-лексариз гъахиди. Думу комп-лексар дивбан бадали, «Эко» ООО Москвайин компанияйи Кьибла Дагъустандиъ 20 гектар жил гъадабгъиди.

«Ихь гьюкуматдиъ чIюр-хярик, зирзибилик цIа кипувал къадагъа апIура. Республикайин кьибла терефнаъ 300 000 тонна зирзибилиз вуйи полигон дивди. Ккун гъабхьи йишварихь урслар апIуз ихтияр адар. Эгер муниципалитетариъ дурар арайиз гъафиш, душван руководителари дурар гьадагъну ккунду. Гьелелиг Кьибла Дагъустан вари лазим вуйи техникайихъди тямин дапIнадар. Зирзибил гьадабгъбан бадали, 120-дихьна машинар герек ву», – давам апIура ич сюгьбатнаъ А.С.Черниковди.

Багарихьди физический ва юридический касарихъди зирзибил гьадабгъбан гьякьнаан йикьрар йитIну ккунду. Думу йикьрариинди, респуб-ликайиъ яшамиш шулайи агьалйири зирзибилихъан гьар касдин кIулихъ пул тувну ккунду. Дагъустандин табиаьтдин ва табиаьт уьбхбан Министерствойин къарариъ гьарсаб шагьриз, гъулаз вуйи ва зирзибилихъан сар касдин кIулихъ тувну ккуни дакьатарин гизаф фаркьвал а. Мисалназ, эгер Дагъустандин Огни шагьриъ сар касдиз 23 манат удубчIвураш, Дербент шагьриъ – 80 манат удубчIвура. Дербент райондин Рубас гъулаъ 23 манат вуш, Мамедгъала посёлокдиъ 38 манат шула. Саб гафниинди, гизаф инсанар яшамиш шулайи йишваъ артухъди пул тувну ккунду.

Альберт Черниковди чав вари Дагъустандиъ зирзибил гьадабгъбаз вуйи пулин дакьатар сабсдар апIуз чарйир зигурайиваликан гъапнийи.

Дупну ккундуки, гьаму вазлихъан хъюгъну, Дербентдиъ чIюрхяр ва зирзибил вахтниинди гьадагъура. Улихьди хьадру йишварихь цIийи контейнерар дивра, дурар дивру йишвар гьязур апIура. Марццишин уьбхбак шагьрин агьалйирира чпин пай кивну ккунду.

Макьала бикIуз гьязур шули, узу шагьрин кючйириз фикир тувунза. Кючйириъ марццишин артухъ дубхьна, пузра шулу. Анжагъ В.Лениндин ччвурнахъ хъайи кючейиъ ариш-веришчйири хябяхъдихьна алапIру гьял гъябкъиган, мюгьтал дархьиди гъузуз шулдар. БицIи ишкIар, пакетар, пуч гъахьи йимишар пакетариъра идривди, гьаци ликарикк ккахьра. Тротуарариин дициб гьял алапIрудари шагьрин мешреб чIур апIура, чпи пул гъазанмиш гъапIхъан тина дурариз шагьур фу гьялназ гъюрашра, фикир ктар.

Му аьгьвалат дигиш апIбан бадали, ухькан гьарсари ихь наразивал улупну, базрариин гюзчивал гъабхурайи тешкилатари чпин вазифйир кIули духну ккунду.

Комментарии:

f1 in1 ok1 t1 v1 y1

Top