ГлавнаяСельское хозяйство«Гъизилин чвул» выставка

«Гъизилин чвул» выставка

1 1 1 1 1 1 1 1 1 1 Рейтинг 3.75 (2 Голосов)

44b

Октябрин 10-13-пи йигъари Москвайиъ кIули гъябгъру Урусатдин гъулан мяишатдин промышленностдин «Гъизилин чвул» выставкайиъ Дагъустандин карханйирра иштирак хьиди. Дидин гьякьнаан октябрин 9-пи йигъан «Дагъустан» РИА-йиъ кIули гъубшу пресс-конференцияйиъ вахтназди вуди РД-йин гъулан мяишатдин ва ипIру-убхъру сурсатарин министрин вазифйир тамам апIурайи Аьбдулмуслим Аьбдулмуслимовди мялум гъапIну.

Вари Урусатдин выставка уьлкейин гъулан мяишатдин тешкилатарин варитIан асас форум ву. «Гъизилин чвул» выставкайи Урусатдин регионариан агъзрариинди иштиракчйир уч апIуру. Гьар йисан му выставкайиъ Дагъустанра иштирак шулу. Региондин карханйири гьамусдиз 56 медаль гъазанмиш дапIна, дурарикан 41 гъизилиндар ву. Гъубшу йисан «Гъизилин чвул – 2017» выставкайиъ Дагъустандин Правительствойиз выставкайин Гран-при тувнийи.

«Республикайин гъулан мяишатдин министерствойин вакилар, выставкайиз гъахру мал-къара айи машинарра хьади, киш йигъан рякъюъ учIвну.

Дурар йишв’ина хъуркьна ва гьамусяаьт выставкайихьна гьязур шула», - гъапну Аь.Аьбдулмуслимовди. Дугъан гафариинди, улихьна йисари Дагъустандин экспозицияйиз лигуз уьлкейин аьхюну пай регионарин вакилар гъюри шуйи. Гъубшу йисан РФ-дин Правительствойин Председатель Дмитрий Медведев республикайин экспозицияйиз лигуз гъафнийи, ва дугъаз гьязур дапIнайи чарвайин йикк гизаф кьабул гъабхьнийи.

Республикайи чарвйир уьрхювалиан уьлкейиъ сабпи йишв дибисна. Гьаддиз выставкайиз жюрбежюр жинсарин чарвйир духна. Душваъ гьацира Дербентдин, Къизларин коньякар гьясил апIру заводарин сурсатарра улупиди. «Къайд апIувал лазим вуки, Дагъустандиъ гьясил апIурайи сурсатарин ери заануб ву. Уьлкейин жара йишвариъра коньяк гьясил апIура, дидин кьиматра аьхюб дар. Хъа Дагъустандин коньяк масу гъадабгъру муштарйириз ихь коньякдин кьимат лайикьлуб вуйиваликан аьгъя.

Дагъустан Республикайи сабпи ражари выставкайиз «Къизларин дюгю» ва «Эко» классдин марччлин нис адабгъура. Ихь республикайиъ гьясил апIурайи дюгю чан тIяаьмлувалиинди машгьур шула. Улихьнаси узу Азербайжандиз душнайи вахтна, Азербайжан республикайиз Къизларин дюгю фукьан масу тувуз шулуш, суал тувнийи.

Ихь республикайиъ гъулан мяишатдин сурсатар химия гизаф ишлетмиш дарапIди гьязур апIурайивализ лигну, муштарйир гизаф шула», къайд гъапIну Аь.Аьбдулмуслимовди. Выставкайин натижйириз дилигну, уьлкейин жара регионарихъди мянфяаьтлу йикьрарра йитIиди.

Журналистарихъди вуйи сюгьбатнаъ Дагъустандин гъулан мяишатдин кIулиъ айири республикайиъ гъулан мяишатдин артмиш’валин рякъяриканра ктибтнийи. Дугъан гафариинди, 2019-пи йисан гъулан мяишатдиз гьюкуматдин терефнаан вуйи кюмек артухъ хьибди.

«Ихь улихь дийибгънайи асас месэла – гъулан мяишатдин ерли сурсатдихъди республика тямин апIувалихъна гъювал ву. Мисал хураза, республикайиъ гьясил апIурайи малдарвалин сурсатнакан 10-12%, хъа йимишар – мейвйирин – 1% тартиб апIуз тувра. Ухьуз гьясил гъапIу сурсатар сабишв’инди масу тувру центрар, йимишар уьрхру складар лазим ву. 300 агъзур тонна гъулан мяишатдин жюрбежюр сурсатар уьрхру йишвар лазим вуди, гъи ихь гъулан мяишатарин зегьметкешариз 24-26 агъзур тонна сурсатар уьрхру йишвартIан адар. Гьаддиз бязи инвесторари гьаму жюрейин объектар тикмиш апIуз планар йивура», - гъапну Аь.Аьбдулмуслимовди.

Ватандашариз кредитар тувбан, гьюкуматдин терефнаан кюмек апIбан месэлара за гъапIнийи. Министерствойин кIулиъ айири гъапиганси, гьаму йисан тазади фермервалин ляхин ккебгърайи касариз грантар тувбан конкурсар гъахьну. Хъа кредитар гъадагъбан бадали, документар дюзди гьязур апIувал лазим ву. 

Комментарии:

f1 in1 ok1 t1 v1 y1

Top