ГлавнаяСельское хозяйствоГьяйванатарихьна ккунивали абцIнайи юкIв

Гьяйванатарихьна ккунивали абцIнайи юкIв

1 1 1 1 1 1 1 1 1 1 Рейтинг 5.00 (3 Голосов)

44
Инсанариз чиб иццруган духтир фици лазим вуш, гьаци гьяйванатаризра лигру духтир лазим ву. Ветеринарвалин пише гьарсаб вахтна лазим вуйи пишеси гьисаб апIура. Улихьна вахтариси дарди, гьамус гьяйванатариз лигру духтирвалин пишейихъ юкIв хъади, дидин эйси хьуз ккунди урхуз гъягъюрайи жигьиларин кьадар йигълан-йигъаз цIиб шула.

Гъи узуз йиз макьалайиъ хайлин йисари мал-къара аьжаликкан ккадагъурайи Имибай Ханмирзаевдикан бикIуз ккундузуз.

 

Имибай Пирмягьямедович 1969-пи йисан Табасаран райондин НичIрас гъулаъ нежбрин хизандиъ бабкан гъахьну. БицIидиган адашдихъди мал-къарайихъ гъягъюри, иццру гъахьи малар-чарвйир гъяркъиган, дугъаз малар сагъ апIру духтир хьуз аьшкь шулу. Гьаци, гъулан кьялан мектеб ккудубкIбалан кьяляхъ, думу Ставрополь крайиъ айи Александровский совхоздин техникумдик ветеринарвалин пишекарвал гъадабгъуз урхуз кучIвру.

1988-пи йисан техникум ккудубкIу жигьил пишекри Ставрополь крайин Арзгирский райондин МТФ-йиъ ветеринарвалин ляхин апIуз хъюгъру.

«МТФ-йиъ ляхин апIуз хъюгъну 6 вазлилан армияйиз гъягъюз дих гъапIнийиз. Армияйиъ гъуллугъ апIурашра, йиз пишейихъди аьлакьалу ляхинра тамам апIури гъахьнийза. Узу урхурайи вахтна инсанариз рубар йивузра гъудубгънийза, ва эскервалин гъуллугъ апIруган, думу аьгъюваларра лазим гъахьнийзуз.

Кьюд йисандин арайиъ Ватан бадали жвув’ин али буржи тамам дапIну, гъулаз кьяляхъ гъафнийза. Багъри гъулаъ ляхин дибрихъур, узу Ягъдигъ гъулан колхоздиъ маларин духтирвалин пишекарвал апIуз гъушнийза. 1991-пи йисан ич гъулахъ ачмиш дапIнайи «Ничрасский» кIуру колхоздиъ сифте ветврачдин, хъасин главветврачдин вазиф-йир хайлин йисари тамам апIури гъахьунза.

Ветеринарияйин духтрин ляхин цIиб ихтиятди дапIну ккуни ляхин ву. Фицики жюрбежюр хасиятнан гьяйванатариз лигуб алабхъуру. Саспиган зат мютIюгъ даршлу мал-къарара алабхъури шулу. Гьаддиз му пишейин вакилар гьарсабдихьна лап ихтиятди янашмиш духьну ккунду», – кIура Имибай Ханмурзаевди.

Учв лихури гъахьи НичIрасарин колхоз ккадабхъбахъан мина гъийин йигъазкьан думу ТIюргъярин ветучастокдин заведующийди лихура. Чаин али вазифйир вахтниинди тамам апIура. Мал-къара ктIебццну кIури хабар хъубкьси, я йишв, я йигъ дарпиди, И.Ханмирзаев чан буржи тамам апIуз гьяракатниинди гъягъюри шулу.

«Мал-къарайик сибирская язва, ящур, эмкар, бруцеллез уьзрар каш ахтармиш апIбан бадали, вахтниинди ифи адабгъну, думу анализар апIуз райондин ветлабараторийиз хътапIури шулча. Гьелелиг ич участокдиъ му жюрейин уьзрар ачмиш духьнадар. Ич терефнаъ уьбхюрайи мал-къара гьар йисан кьюрдну галариз, хьадан вахтна – сивариз хъапIрача. Думу мал-къарайиз нубатнахъди 10 кас лигура, ва узу йиз пишейихъди аьлакьалу ляхинра тамам апIураза. Къайд апIуз ккундузузки, узу лигурайи участокдин мал-къара уьбхюрайи галар-сиварин аьтрафариина жара районарин мал-къара гъафиган, эгер дурариз ветеринар духтрин кюмек лазим гъабхьиш, гьаммишан кюмек апIури шулза ва гьамусдихъан тинара кюмек тувуз гьязур вуза», – кIура йиз сюгьбатчийи.

Жвуван вазифйир намуслувалиинди кIулиз адагъурайивализ лигну, Имибай Ханмирзаев райондин ва республикайин терефнаан швнуб-саб ражари гьюрматнан грамотйириинди пешкешлу гъапIну. Заан дережайиъди дугъу гъабхурайи ляхин аьхиримжи йисари Республикайин ветеринарияйин Комитетдиан премияйииндира лишанлу гъапIну.

Гъит, гьарсаб вахтна ихь арайиъ гьамци чав апIурайи ляхнихъ, мал-къарайихъ юкIв хъайи касар артухъ ишри. Хъа ухьуз айи мал-къара зат иццру дарибшри.

Комментарии:

f1 in1 ok1 t1 v1 y1

Top