ГлавнаяСельское хозяйствоЧарвйир галариз хъаъра...

Чарвйир галариз хъаъра...

1 1 1 1 1 1 1 1 1 1 Рейтинг 4.75 (2 Голосов)

Октябрин гьацIариан мина республикайин дагълу районарин мал-къара кьюрдун вазаризди галариз хъапIну гъягъюз хъюгъна. Республикайиз асас вуди гьар йисан мал-къара хъапIну гъягъюрайи 7 зона а (Бабаюрт, Къизлар, Кочубей, Уланхол, Къизилюрт, Бакрессдин ва Дербент).

РД-йин гъулан мяишатдин ва ипIру-убхъру сурсатарин Министерствойин чарвйириз ва мал-къарайиз ипIруб гьязур апIбан месэлйириз лигбан отделин начальник Юсуп Гьясановди узуз республикайиъ мал-къара галариз хъапIбанмесэла фици гьял апIураш, мялуматар тувну. Дугъан гафариинди, мал-къара галариз хъапIру вахт ккебгъайиз хайлин вахт ккимиди, республикайин гъулан мяишатдин ва ипIру-убхъру сурсатарин министр Аьбдулмуслим Аьбдулмуслимовдин тIалабниинди мал-къара галариз хъапIну гъягъбан месэлйириз лигру гьяракатнан штаб тешкил дапIна.

«Цци хьадукран вазари галариъ кьюрд адапIу 1 миллионна 350 агъзур чарвйир сивариз хъаъну гъафну. Дурарикан 1 миллионна 55 агъзур ликри хъаъну гъафидар ву, хъа имбунудар машинариъди. Гьаци, кIару маларра 1700 аьдад галариан сивариз хъаъну. Гьамусяаьт мал-къара гьяракатниинди галариз хъапIна. Гъийин йигъаз пландиъ айи 1 миллионна 316 агъзурна 235 аьдад чарвйирикан галариз 480 агъзурна 924 чарва хъаъна. Дурарикан 41 агъзурна 310 машинариъди, хъа имбунудар ликри хъаънайидар ву», – гъапнийи отделин начальникди.

Дугъу мялум гъапIганси, галариз хъаъну душну ккуни кIару маларикан гьелелиг 1700-тIан хъаънадар.

Пуб лазим вуки, галарин гьялра, Юсуп Сяидовичдин гафариинди, ужуб дар. Кочубей зонайин галарин гьял читинуб ву. Себеб – мархьар адрувал. Хъа имбуну зонйириъ гьамусяаьт саб тягьяр вушра ипIруб а.

Чарвйир галаризди рякъюъ аайиз, дурар цIиб вахт ккимиди жюрбежюр уьзрариз ва хицIариз аькси вуйи дармнарихьди тартиб апIура. Галариз хъаъну гъягъруган, дурар ветеринарин гюзчиваликкди гъягъюра.

Юсуп Гьясановдин гафариинди, пландиинди улупнайи вари кьадар мал-къара ноябрин йицIбариз галариз хъапIну ккудубкIиди.

Комментарии:

f1 in1 ok1 t1 v1 y1

Top