ГлавнаяСельское хозяйствоМалдарвалин цирклин гъайгъушнар

Малдарвалин цирклин гъайгъушнар

1 1 1 1 1 1 1 1 1 1 Рейтинг 5.00 (1 Голос)

image

Дербент райондин гъулан мяишатдин пишекрари, чпиз айи мумкинвалар ишлетмиш апIури, гьаммишан ужуб зегьмет зигура. Республикайин экономика артмиш апIбак лайикьлу пай киври, жил ригъун мейвйирин багълариз илтIибкIуз чалишмиш шлуганси, малдарвалин циркил артмиш апIбаъра намуслу ляхин улупура.

Райондин гъулан мяишатдин малдарвалин цирклин кIулин пишекар Мамедрашад Къурбановди тасдикь гъапIганси, гьамусдиз Дербент райондин вари мяишатариъ 11850 мал а, дурарикан 5280 хюнйир ву. Гьацира 16148 чарвара а, дурарикан 8623 баб – марччар ву. Мяишатариъ мал-къарайиз 13 600 тонна укI, 1328 тонна лембе ва 140 тонна силос гьязур дапIна.

М.Къурбановдин гафариинди, «Жемикент» агрофирмайиъ 40 мал а, дурарикан 20 ккудурзру хюнйир ву. Му мяишатдиъ кьюрдуз вуди 200 центнер укI гьязур дапIна.

Райондиъ вартIан ужубси гьисаб апIурайиб «Татляр» ферма ву. Душваъ 101 мал а, дурарикан 20 хюнйир ву. Му мяишатдиъ 300 центнер укI, 500 центнер лембе, жюрбежюр мягьсулар кидикьну, 600 центнер малариз ипIруб гьязур дапIна.

«Каспий» агрофирмайиъ 155 мал а, дурарикан 55 хюнйир ву. Му мяишатдиъ 450 центнер укI, 700 центнер лембе, жюрбежюр мягьсулар кидикьну, 700 центнер малариз ипIруб гьязур дапIна. Маларин аьхъярра рас дапIна. Анжагъ му аьхъярин гъваар бинайиан рас дапIну ккунду.

«Чинар» агрофермара ужудар мяишатарин жергейиъ а, гъапишра шулу. Мушваъ 63 мал а, дурарикан 23 хюнйир ву. Гьацира мяишатдиъ 80 центнер укI, 400 центнер лембе, 400 центнер малари итIру кидикьнайи мягьсулар гьязур дапIна.

Нариман Аьлиевдин ччвурнахъ хъайи мяишатра ужудар мяишатарикан саб ву. Мушваъ 118 мал а, дурарикан 32 хюнйир ву. Мяишатдиъ 122 чарвйирра а, дурарикан 37 ччилар хру баб-марччар ву. Гьаму вахтназ мяишатдиъ 400 центнер укI, 700 центнер лембе, 1400 центнер силос ва 520 кидикьнайи мягьсулар гьязур дапIна. Зиихъ кудуху вари мяишатариъ малар аъру аьхъяриъ расвалин ляхнар тамам дапIна, ва дурар марцц дапIну, дезинфекцияйин ляхнарра кIули духна», – натижйир гъивнийи Мамедрашад Къурбановди.

Дупну ккундуки, райондин вари мяишатариъ айи фермйир йирсидар ву. Мал-дарвалин цирклин пишекрари дурар гьар йисан рас апIура, ва гьамусяаьт дурар кьюрдуз гьязурди ву. Фермйирин аьтрафарра марцц дапIна, мал-къарайиз гьязур дапIнайи алафра гьубкIну а.

М.Къурбановди тасдикь гъапIганси, мал-къарайи кьюрдун фасил ужуди адапIбан бадали, лазим вуйи вари ляхнар кIули духна.

Комментарии:

f1 in1 ok1 t1 v1 y1

Top