Натижалу дигиш’валарин, аьхю умударин девир

1 1 1 1 1 1 1 1 1 1 Рейтинг 5.00 (2 Голосов)

Комсомолин 100 йисаз бахш вуди…

222
Жиниб дар, думу тешкил гъапIхъан мина хайлин йисар тарихдиз душна. Вушра инсаниятдин думу вахтар кIваълан душнадар. Октябрин 29-пи йигъан комсомолин наслари ВЛКСМ-дин 100 йисандин юбилей къайд апIиди.

Улупнайи деврикан улхруган, гъийин агьалйирин думу вахтарикан вуйи фикрарра жюрбежюрдар ву.

– Советарин вахтари уьмрихьна вуйи лигбар жарадар вуйи. Комсомолин тешкилатдиз аьхю мяна айи. Къайд апIурза, комсомолин жергйириз фунур-вушра кас кьабул апIурира гъахьундар. Дурарин арайиъ яшар 14-йис тамам гъахьи ужударсдар живанар шуйи. Комсомолар вуйивал учу машгьурвалси, уч’ина саб аьхю хъугъ’вал дубхнайиси, гьюкуматдин улихь жавабдар вуйиси гьюрматлуди къаршуламиш апIуйча. Дугъриданра, комсомолин жергйириз кьабул дапIнайи жигьилари чиб чпин гъарашугъарин, жямяаьтлугъдин улихь вари терефариан нумуналуди гъахуз зегьмет зигуйи.

Комсомолиз кьабул апIру йигъахьна саб аьхю машкврихьнаси гьязур шуйи. Дидин устав кIваълан апIувал чарасуз вуйи. Мектебариъ мялимари комсомолин жергйириъ жвув лайикьлуди гъахбан гьякьнаан кьатI’и табшуругъар тувуйи. Хъа райкомариъ тялукь комиссияйин вакилари набалугъ комсомолц-йирихъди гюрюшар тешкил апIувал аьдатназ илтибкIнайи. Комсомолин ччвурназ лайикь хьпан метлеб ади гьарсар урхурайири мектебдиъ чав ла-йикьлуди гъахуз зегьмет зигуйи, – гъапну, комсомоликан вуйи фикрар ачухъ апIури, ич арайиъ гъабхьи гюрюшдиъ 80-пи йисари Хив райондин М. гъулан мектебдин комсомолин тешкилатдин кIулиъ гъахьи Зумриятди.

Дугъриданра, йиз сюгьбатчийи чав комсомолиз кьабул гъапIу вахтар дамагълуди ва фурслуди кIваина гъахнийи.

– Комсомолин вакиларин уьмур маракьлуб вуйи. Учу кми-кмиди жямяаьтлугъдиз хайирлу жюрбежюр серенжемариз уч шуйча. Серенжемдиз улупнайи асас вахт ккудубкIишра, хулаз гъягъюз гьялак шлу касар ади шулдайи. Вари уьмуми ляхниин машгъул духьну шуйи. Хъа гъийин насларин уьмрин гьякьикьатдиз фикир тувиган, юкIв сикинсузвали, гележегдин мялум дарувалин къурхулу фикрари абцIру. Уьмриъ гележегдиз чпин улихь кьатI’и метлебар дивуз удудукьрайи жигьилар гъи фукьан ашул?! Му, гъийин нас-лар бажаранлудар дар, кIурайи гаф дариз. Ухьуз фукьан-вушра зигьимлу, фунуб ляхнизра шерик вуйи жигьилар ахьуз, амма комсомоларин деврихь тевиш, гъи, тялукь гъатар сатIи дапIну, дурарин улихь кьатI’иди уьмуми месэлйир дивру регьбер адар. Комсомолин тешкилатди уьмуми фикрар айи жямяаьтлугъ гъатар сатIи апIбаъ аьхю роль уйнамиш апIурайи.

Гъийин деврин гьякьикьат фикирназ гъадабгъиган, ВЛКСМ-дин тажруба гьамусяаьтдира тIалаблу ву. Фицики 90-пи йисари ихь гьюкуматдиъ арайиз гъафи дигиш’валарин натижайиъ хайлин йисари ккабалгу саб жерге ужудар къайдйир шилкьан имдарди гъудургну. Гьадму гьисабнаан комсомолин тешкилатра гъарабгъну, думу эвез апIрубра улупундар. Натижайиъ наслар тербияламиш апIбан рякъюъ мялум дарувалин къурхулу ичI арайиз гъафну. Гьамус гьюкмин кIулиъ айидар ва жямяаьтлугъдин сагъу гъатар, гьяйифки, дидин натижйирихъди женгнаъ а, – аьлава гъапIну йиз сюгьбатчийи.

Комментарии: