«Жигьиларин варитIан кьувватлу тешкилат вуйи»

1 1 1 1 1 1 1 1 1 1 Рейтинг 5.00 (2 Голосов)

Комсомолин – 100 йис

333

Октябрин 29-пи йигъан Табасаран райондин центр Хючна гъулаъ айи культурайин Хулаъ комсомолин 100 йис тамам хьпахъди аьлакьалу серенжем кIули гъубшнийи. Зал бегьемди абцIнайи.

Серенжемдиз улихьган чпин уьмур комсомолихъди аьлакьалу гъапIу касар ва гъийин жигьилар дуфнайи. Серенжем кIули гъабхури, Хючна гъулан 1-пи нумрайин кьялан мектебдин пионервожатый Бесият Гьяжиевайи ва Хючнаарин 2-пи нумрайин кьялан мектебдиъ урхурайи Ислам Аьбдулгьямидовди комсомолин тарихдикан, диди ккадапIу рякъюн асас геренарикан гъапнийи. Хючнаарин 1-пи ва 2-пи нумрйирин мектебариъ урхурайидари комсомолиз бахш вуди музыкайин ва литературайин эсерар гьязур дапIнайи.

Комсомолин юбилейин серенжемдиъ чан уьмур мектебдихъди, комсомолихъди ва коммунистарин партияйихъди аьлакьалу гъапIу ва чан студент йисари целина мютIюгъ апIбан медалихъди лишанлу гъапIу Тажудин Мягьрамов, 1984-1989-пи йисари СССР-ин Верховный Советдин депутатди гъахьи Угълангерек Аьбдулкеримова, Табасаран райондин ВЛКСМ-дин райкомдин кьюрпи секретарди гъахьи Ольга Красноженова удучIвну гъулхнийи.

Дурари къайд гъапIганси, ВЛКСМ – му совет уьлкейин инсанарин швнуб-саб девриз уьмрин мектеб гъабхьну. Комсомоли уьлкейин машгьур тарихдиъ аьхю роль уйнамиш гъапIну. Дюн’яйин тарихдиъ Лениндин комсомолсиб кьувватлу жигьиларин жара тешкилат ади гъабхьундар. Ислягь девриъра, дявдин йисарира, коммунистарихъди сатIиди, комсомолар сарпидар вуди женгнаъ учIври, целинайиз гъягъюри, аьршдиз тIирхури ва чпихъди вари жигьилариз дих апIури гъахьну. Тарихдин гьарсаб сяргьятдиъ комсомолин арайиан дидин ччвур хъана машгьур ва адлу апIру агъзрариинди игитар удучIвури гъахьну. Ватандиз гъуллугъ апIбан дурарин нумуна гьамусдин ва гъюру насларин фикриан дубгидар. ВЛКСМ-дин жергйириъ агъзрариинди табасаранарра айи.

29-пи октябрь гьацира «Урусатдин мектебариъ урхурайидарин гьяракат» (РДШ) тешкилатдин Йигъ вуйи. Комсомолин юбилейиз бахш дапIнайи серенжемдин аьхириъ Хючнаарин сабпи нумрайин мектебдиъ урхурайидарин саб десте думу тешкилатдиз кьабул гъапIнийи.

Шиклиъ: Ольга Красноженова (шиклиъ гагвлахъан арччлахъинди) ва Тажудин Мягьрамов комсолин юбилейиз тялукь вуйи серенжемдиъ.

Комментарии: