ГлавнаяЮбилеиГьацI аьсриъ комсомолиъ

ГьацI аьсриъ комсомолиъ

1 1 1 1 1 1 1 1 1 1 Рейтинг 5.00 (1 Голос)

Комсомолин – 100 йис

3432

Гьаму йигъари Мягьячгъала шагьриъ Урус театрин аьхю залиъ Лениндин комсомолин 100 йис хьпаз бахш дапIнайи серенжемар кIули гъушну.

Зализ комсомолин швнуб-саб наслин ветеранар ва комсомолин баркаллу аьдатар давам апIуз кьаст ади, дидик кучIвнайи жигьил вакилар уч духьнайи. Дурарин цIарнаъ республикайин жямяаьтлугъ ляхнарин жанлу терефкар, ихь машгьур ва успагьи ватанагьли, Расул Гьямзатовдин фонднан вице-президент Гьябибат Аьзизовара айи.

Гьябибат Нажмудиновна ВЛКСМ-дик кучIвхъан мина цци 50 йис тамам гъабхьну, хъа мура юбилей гьисаб шула. Учу дугъахъди «Табасарандин нурар» газатдин (tabasarandin_nurar) инстаграмдин аккаунтдиъ прямой эфир гъабхбан къайдайиинди сюгьбатра тешкил гъапIнийча. Гьякьлуди гъапиш, эфириъ гизаф кьадар жигьилари Гьябибат Нажмудиновнайиз комсомолин гьякьнаан суалар тувнийи.

Гьябибат Аьзизова комсомолик ДГПИ-йиъ урхурайи йисари кучIвнийи. Сифте думу 3 йисан ВЛКСМ-дин членди, хъа институтдин комсомолин комитетдин секретарди, хъасин Мягьячгъала шагьрин комсомолин комитетдин членди ктагънийи. Гьадму йисхъан мина Гьябибат Нажмудиновна студентарин дестйирихъди сатIиди республикайин жямяаьтлугъ ляхнариъ иштирак хьуз хъюгъну. «Студентарин арайиъ ватанпервервалин гьиссар лап гьевеслуди артмиш шуйи. Сар касдизра гуж апIрур, яна ляхнариин алаърур, гъахьундайи. Вари аьхю аьшкьниинди, чпин хушниинди жямяаьтлугъ ляхниз кюмекназ гъюйи. Мягьячгъала шагьриъ саки вари институтариъ урхурайи табасаран шубар кми-кмиди сатIиди уч шуйча. Дурар вари комсомолик кайидар вуйи. Уч гъахьидари, ихь милли хурагар гьязур апIури, ихтилатар ктитури шуйча. Комсомоли думуган агьалйирин сагъламвализра аьхю фикир туврайи. Гьаци учу варидари, бай-риш дарпиди, ГТО тувну ккундийи», – кIваин апIура Гьябибат Аьзизовайи. Хъа, ГТО-йин къайдйирси, комсомолин гьарсар вакили пишекарвалин дерин аьгъювалар гъадагъувалра сабпи йишв’ин дивнайи.

«ИкибаштIан, читинваларра адарди шулдайи. Амма ихь студентар гьаммишан сар-сариз кюмекназ гъюйи. Саб общежитиейиъ яшамиш шулайидарин вари уртахъди шуйи. Абйир-бабари сариз гъул’ан шишал картфар, хъа тмунуриз нисун ккикк хътапIиш – дурар саки вари общежитиейиъ айидариз кауйи», – ктибтура Гьябибат Нажмудиновнайи.

Ав, комсомолин вакилари, чпин юлдшариканси, кIулди вари уьлке ликриин апIбакан, думу ляхник пай кивбакан фикир апIури гъахьну. Гьаци, аьхю дестйириинди БАМ-диз, Саяно-Шушенский ГЭС-диина, целинайиина гъягърударин гьевес рябкъруган, мюгьтал шуйи.

«Гьаму йигъари республикайиъ ВЛКСМ-дин 100 йис къайд апIбан серенжемдиъ Дагъустандин 6 жигьил комсомолин жергйириз кьабул гъапIну. Гъи мициб дюшюш шул кIури, фикир дайиз. Пионерарин хори ич жигьил вахтнан мяълийир тамам апIури гъахьнийи. Залиъ уч духьнайи вари агьли касарин думу мяълийири жигьил вахтнан гьиссар уягъ хьуз гъитну. Узу гъийин жигьилариз сабпи нубатнаъди ватан ккун апIуб теклиф апIураза. Багъри жил, ватан ккундарш, гьичра яшамиш хьуз шулдар. Хъа уж’вал анжагъ кIваъ ккунивал айи инсанди апIруб ву. Тарих адарди гележегра шлуб дар, хъа гележег ислягьвалинуб хьпан бадали, уж’вал апIуз, дуствал уьбхюз, сар-сарихьна саламатди янашмиш хьуз гьялак йихьай», – аьлава гъапIнийи Гьябибат Аьзизовайи.

Къайд апIуб лазим вуки, Гьябибат Нажмудиновна, дугъриданра, багъри халкь, ватан, тарих, аьдатар кIваантIан ккуни инсан ву. Анжагъ гьацир касдихьантIан гьацI аьсриъ комсомолин билет ва дидин лишан багьалу савкьатарси уьрхюз хьибдайи. Яв ватанпервервализ чухсагъул, Гьябибат хала. Гъит, яв уьмрин рякъ анжагъ хъуркьувалар айиб, ужудар гьядисйириинди девлетлуб ибшри.

Комментарии:

f1 in1 ok1 t1 v1 y1

Top